Дар ноҳияи Синои шаҳри Душанбе соли 2025 6 корхонаву коргоҳҳои нави саноатӣ мавриди истифода қарор гирифтааст. Дар ин бора имрӯз - 4 феврал Умед Гуреззода, раиси ноҳия зимни нишасти хабарӣ иттилоъ дода, гуфт, ки дар ин корхонаҳо 412 нафар бо ҷойи нави кор таъмин шудаанд.

Инчунин, ба гуфтаи ӯ, айни замон дар ҳудуди ноҳия 341 адад коргоҳу корхонаҳои саноатӣ фаъолият доранд, ки дар онҳо истеҳсоли 82 намуди маҳсулот ба роҳ монда шудааст.

- Дар моҳҳои январ - декабри соли 2025 дар корхонаҳои саноатии ноҳия дар маҷмуъ ба маблағи 2 миллиарду 708,1 миллион сомонӣ маҳсулот истеҳсол гардид, ки нисбат ба соли 2024 ба маблағи 727,1 миллион сомонӣ зиёд буда, суръати афзоиши он 136,7 фоизро ташкил медиҳад-гуфт раиси ноҳия.

Умед Гуреззода дар идома таъкид намуд, ки соҳаи саноат дар ноҳия тамоюли рушди мунтазам дошта, солҳои охир суръати бештар касб намудааст ва дар самти саноатикунонии босуръати мамлакат саҳми калон мегузорад.

Гулафшон КАРИМОВА, “ҶТ”