Дар ҳошияи эълон гардидани соли 2026 ҳамчун Соли вусъат додани корҳои ободонию созандагӣ ва тақвияти худшиносии миллӣ дар вилояти Хатлон “300 рӯзи созандагиву бунёдкорӣ ва масъулият барои ояндаи дурахшони ватан” эълон шуд.

Дар ин бора аз хадамоти матбуоти раиси вилоят хабар доданд. Ба иттилои манбаъ 300 рӯзи созандагиву бунёдкорӣ бо ибтикори Давлаталӣ Саид, раиси вилоят роҳандозӣ гардида, ҳадаф аз он ба таври шоиста таҷлил кардани 35-солагии Истиқлоли давлатӣ дар ҳудуди вилоят мебошад.

Раиси вилоят зимни эълони 300 рӯзи созандагиву бунёдкорӣ таъкид кардааст, ки “соли 2026 барои мардуми Тоҷикистон соли таърихӣ буда, ҳар як шаҳрванд бояд дар ободонӣ, тозагӣ ва беҳсозии муҳити зисти худ - аз хона то маҳалла саҳми фаъол гузорад”.

Ҳамчунин, гуфта мешавад, ки дар доираи омодагӣ ба таҷлили 35-солагии Истиқлоли давлатии Ҷумҳурии Тоҷикистон, нақшаи корҳои ободонию бунёдкорӣ дар вилояти Хатлон бо нишондиҳандаи 106 фоиз иҷро гардида, ба ҷойи 6260 иншооти пешбинишуда 6640 иншоот сохта ва мавриди истифода қарор дода шуд.

Дар идомаи ин иқдомҳои созандагӣ, дар соли 2026 бунёди зиёда аз 1500 иншооти нав, аз ҷумла муассисаҳои маориф, томактабӣ, тандурустӣ ва беш аз 80 корхонаву коргоҳи саноатӣ дар назар дошта шудааст.