Агентии содироти назди Ҳукумати Ҷумҳурии Тоҷикистон созишномаи ҳамкорӣ ва фаъолияти якҷоя оид ба амаликунии сохтори Хонаи савдои Тоҷикистон дар Ҷумҳурии Эстонияро ба имзо расонидааст.

Дар ин бора 2 август Баҳриддин Сироҷиддинзода, директори Агентӣ зимни нишасти хабарии ин ниҳод иттилоъ дод.

Гуфта шуд, ин иқдом баъди соҳибистиқлолии кишвар бори аввал аст, ки роҳандозӣ мегардад ва ба оғози фаъолияти нахустин Хонаи савдои Тоҷикистон дар Эстония ҳамчун роҳ ёфтани содироти маҳсулоти ватанӣ ба кишварҳои Иттиҳоди Аврупо мусоидат менамояд.

Гуфта шуд, яке аз гуфтушунидҳои натиҷабахш ин ба мувофиқа расидани Агентии содирот бо ширкати "Universal Treyd XL" ҷиҳати дар ҳудуди Ҷумҳурии Тоҷикистон таъсис додани корхонаи муштарак оид ба бунёди Маркази тақсимоти яклухти маҳсулоти кишоварзӣ ва ба роҳ мондани истеҳсоли консентратҳои меваҳои табиӣ бо мақсади содироти маҳсулоти омодашуда ба Озарбойҷон ва кишварҳои сеюм ба шумор меравад.

Таъкид гардид, ки айни ҳол КВД "Тоҷагропромэкспорт"- и Агентӣ бо мақсади тақвият бахшидани ҳамкориҳо ва ба роҳ мондани содироти маҳсулоти ватанӣ бо 32 нафар намояндагони диаспораҳои тоҷикони дар якчанд шаҳрҳои Федератсияи Русия ҳамкориҳоро ба роҳ мондааст

Дар идома қайд гардид, ки Агентии содирот тавассути КВД "Тоҷагропромэкспорт" бо ширкатҳои хориҷӣ шартномаҳои ҳамкорӣ ба имзо расонида, дар умум 1446 тонна маҳсулоти кишоварзӣ, аз ҷумла 1095 тонна пиёз, 275 тонна олу, 40 тонна лаблабу, 18,5 тонна шафтолу ва 17,5 тонна қаламфури булғорӣ содирот карда шуд.

- Тибқи дархости шарикони тиҷоратӣ ба нақша гирифта шудааст, ки зиёда аз 2 ҳазор тонна ангур, 400 тонна олуи сиёҳ, 300 тонна маҳсулоти полезӣ (тарбуз, харбуза) ва 300 тонна хурмо ба Русия ва Беларус содирот шавад. Инчунин, оид ба содироти як тонна асал ба Аморати Муттаҳидаи Араб гуфтушунидҳо идома дошта, қарор аст содироти асали табиӣ ба ин мамлакат роҳандозӣ карда шавад, - гуфт Б. Сироҷиддинзода.